Tanrıya  müraciətim

Zor gəlib zamanın bu zoruna mən

Üz tutdum allahın hüzuruna mən,

Diz çöküb yalvardım: Ulu yaradan

Qurtar millətimi bu bəlalardan

Qurtar ləkələrdən,təhlükələrdən

Bu mərrəkələrdən,səksəkələrdən

Çadırda sitəmdən,ölümdən qurtar

Zülümkardan qurtar,zülümdən qurtar

Yerdə allahlardan,peyğəmbərlərdən

Birdə imamlardan onlardan qurtar

Qurtar iftiradan, böhtandan,şərdən

Tökülən bu nahaq qanlardan qurtar

Qurtar intiqamdan,intiqamçıdan

Sirli ittihamdan,ittihamçıdan

Şeytandan,iblisdən qurtar milləti

Nefsden,qefesden qurtar milləti

Qurtar yalanlardan,yalançılardan

Qurtar talanlardan,talançılardan

Hanı o sərvətim, dövlətim,varım?

Yer yedi,göy uddu səmimiyyəti?

Yaradıb bəlaya salarkən Tanrım,

Niyə yaradırdın sən bu milləti?

  Tanrıdan səs gəldi:Zavallı bəndəm

Ay başı qapazlı,zopalı bəndəm

Haqqınız varmı ki,küsməyə məndən?

Türk oğlu,Türk qızı yaratdım sizi

Üzü ağ yaşadıb gəzdirmək üçün,

Bəlkədə süd gölündə üzdürmək üçün

Bir cənnət məkana mən atdım sizi

Ancaq çevrildiniz naxçıvanlıya

Ermənistanlıya,ya şirvanlıya

Salyanlı ya qaxlı oldunuz niyə?

Ağdamlı,qazaxlı oldunuz niyə

Qoydunuz milləti tərəzilərə,

Böldünüz irqlərə,sülalələrə,

Pay piyadalara,süvarilərə

Böldünüz canlara,cangürdənlərə

Buğda yerinə can üyüdənlərə

Yaratdım yeri,göyü,insanı

Bir yol ayırmadım,naxışlamadım

Xalqa vətən verdimAzərbaycanı,

Heç zaman heç kimə bağışlamadım

Naz-nemət verdim ki,yaşasın millət,

Ölməsin qalmasın çətində,darda

Sərvəti namərdlər uduzdu fəqət,

Qumarxanalarda, kazinolarda

Nahaq kor etmədim,kor bayquşları,

Nahaq nur vermədim yapalaqlara,

Oğrular əliylə millətin varı,

Dağıldı,yığıldı sirli banklara,

Millətə dil verdim qlınc tək kəsən

Ovxarlansın,düşmən bağrını yarsın

Vermədim,boğulub ölsədə bəzən,

Tərif dənizində tufan qoparsın

Kənarda yaratdım düşməni sizə

Qənim kəsildiniz,bir-birinizə

Necə çarə qılım mən belə dərdə,

Qəzəb canda yatır,kin qında yatır.

Millət oğruları imarətlərdə,

Millət oğulları zindanda yatır.

Göyləri gurlatdım ayılmadınız,

Yerləri titrətdim,ayılmadınız,

Selləri coşdurdum,ayılmadınız,

Suları daşdırdım,ayılmadınız

Bu da torpaq dərdi,Qarabağ dərdi,

Dərdə də ayıltmadı,kara gəlmədi...

Bu yolda adətkar,öyrəncəli siz,

Dönüb din imana gəlməyincə siz,

Şahlar,hökümdarlar qabağında yox,

Vətənin yolunda ölməyincə siz,

Bilinki sizinki Allahlıq deyil,”

Səndə get əyənlər önündə əyil,

...Bəs bu səda hardan:” Əyilmə,şah dur,

Qırma ümidini,bir səbrini bas!

Allah zalım deyil,qadir Allahdır,

Qəzəbi keçsə də yaşadar,qırmaz!!!...”

Famil Mehdi